Cerita Dane Paulus Kaejuk miwah Cerita indik Pamargin Danene ka Kota Roma
21:1—28:31
Dane Paulus Luas ka Kota Yerusalem
21
Sasampune mapamit kapining para penglingsir kramane saking Kota Epesus,
raris dane Paulus sareng anake sane nyarengin dane langsung malayar nuju Pulo Kos.
Tur benjangne tiang sami rauh ring Pulo Rodos.
Saking irika tiang sami nglanturang pamargine kantos ring Kota Patara.
2 Ring Patara,
tiang sami polih kapal jagi malayar ka Wawidangan Penisia.
Tiang sami numpang kapale punika raris malayar.
3 Ritatkala malayar,
tiang sami ngliwat delod Pulo Sipruse.
Tur tiang sami nglanturang malayar nuju Propinsi Siria raris rauh ring Kota Tirus krana irika barang-barang kapale musti katedunang.
4 Irika tiang sami manggihin para pengiring Sang Hyang Yesuse.
Tur tiang sami meneng irika kantos aminggu suene.
Malantaran tuntunan Roh Sang Hyang Pengardi,
kramane irika nuturin dane Paulus mangda nenten luas ka Yerusalem.
5 Nanging sasampun rauh galahe tiang makasami jagi malayar,
raris tiang mapamit mangda nglanturang pamargin tiange.
Makasami pengiringe irika sareng rabin miwah alit-alitnyane ngatehang tiang sami kantos ka jaban kotane.
Irika,
ring pasisir segarane,
tiang sami sareng-sareng matimpuh saha mabakti.
6 Sasampune tiang sami saling ngaturang pamit raris menek kapal,
salanturnyane para pengiringe pada budal ka umahnyane suang-suang.
7 Saking Kota Tirus punika,
tiang sami malayar kantos rauh ring Kota Tolemais.
Tiang sami ngaturang salam kapining para anak pracayane raris meneng awai irika.
8 Benjangane tiang sami nglanturang pamargin tiange kantos rauh ring Kota Kaisarea.
Irika tiang sami nuju jeron dane Pilipus,
salah tunggal saking papitu pengayah sane kapiliha mangda nglaksanayang ayah-ayahan kapining para jandane ring Yerusalem.
Dane Pilipus punika anak sane setata ngortiang Orti Rahayu indik Sang Hyang Yesus.
Irika tiang sami meneng ring jeron danene.
9 Dane madue putri bajang-bajang papat sane kalugrahin mangda midartayang pabesen saking Sang Hyang Pengardi.
10 Sasampune makudang dina tiang sami meneng irika,
raris rauh sinoman Sang Hyang Pengardi saking Wawidangan Yudea sane mapesengan Agabus.
11 Dane Agabus ngrauhin tiang sami raris ngambil slempot dane Pauluse.
Tur dane Agabus nganggen slempote punika buat negul tangan lan cokornyane praragan saha mabaos sapuniki,
“Niki sane kanikayang olih Roh Sang Hyang Pengardi,
‘Anake sane nuenang slempote puniki jagi kategul sekadi puniki olih para anak Yahudine ring Yerusalem.
Raris anake punika kaserahang ring anake sane nenten Yahudi.’”
12 Ritatkala tiang sami mirengin paindikane punika,
tiang sami lan para semeton sinamian ring Kota Kaisarea nunas ping banget mangda dane Paulus nenten luas ka Yerusalem.
13 Nanging dane Paulus mabaos sapuniki,
“Ngudake ragane sami nangis tur ngranayang manah tiange dekdek?
Salingke kategul,
padem tiang siaga ring Yerusalem krana parab Sang Hyang Yesus.”
14 Dane Paulus nenten kayun mirengin tiang sami.
Punika mawinan tiang sami nenten nambakin dane malih tur mabaos,
“Banggiang ja pikayunan Sang Ratu Agung sane mamargi.”
15 Sasampune makudang dina meneng ring Kota Kaisarea,
raris tiang sami madabdaban tur luas ka Yerusalem.
16 Wenten pada makudang diri para pengiring saking Kota Kaisarea sareng-sareng ngatehin tiang sami ka jeron dane Manason.
Dane Manason puniki nenten tios anak saking Pulo Siprus sane sampun sue dados pengiring Sang Hyang Yesus.
Ring umah danene tiang sami nginep.
Dane Paulus Matemu sareng Dane Yakobus ring Kota Yerusalem
17 Ritatkala tiang sami rauh ring Kota Yerusalem,
para anak pracayane irika nyambut tiang antuk manah sane sukarena.
18 Benjangane dane Paulus sareng tiang sami nyinggahin dane Yakobus.
Irika pada wenten penglingsir kramane sami.
19 Dane Paulus ngaturang salam ring ipun sami raris nyeritayang sekancan paindikan sane kalaksanayang olih Sang Hyang Pengardi malantaran ayah-ayahan danene ring anak sane nenten Yahudi.
20 Mirengin baos dane Pauluse,
ipun sami ngagungang Sang Hyang Pengardi,
tur mabaos kapining dane sapuniki,
“Duh,
Paulus,
semeton tiange!
Ragane musti uning,
sujatine sampun penyiuan akehne anak Yahudi dados pracaya kapining Sang Hyang Yesus.
Ipun makasami anak sane satya nglaksanayang saluirin ukum agama Yahudine.
21 Tur sane mangkin,
ipun sami sampun mirengin orti sane bobab indik ragane ngajahin anak Yahudine sane meneng ring bangsane sane nenten Yahudi mangda ipun ngutang ukum agama Yahudine.
Kenten pada ipun sami mirengin indik ragane ngajahin ipun mangda nenten nyunat para okannyane lan nenten ninutin adat anak Yahudine.
22 Pastika para anak Yahudine sane sampun pracaya punika jagi mirengin indik ragane sampun wenten iriki.
Sane mangkin,
napike sane jagi laksanayang iraga?
23 Sapatutne ragane ninutin baos tiange sami.
Wenten papat diri anak sane sampun majanji kapining Sang Hyang Pengardi.
24 Ajak ja makapapat anake punika mangda sareng-sareng ngamargiang upacara muputang janjine punika:
sarengin ja ipun tatkala nglaksanayang upacara pabersihan raga punika.
Tur taur ja ongkos ipune mangda ipun sida kacukur.
Sekadi punika anake akeh jagi uning napi sane pirengin ipun indik ragane nenten ja saja krana ragane tetep nyalanang ukum agama Yahudine.
25 Nanging ring anake nenten Yahudi sane pracaya kapining Sang Hyang Yesus,
tiang sami sampun nulis surat.
Daging surate punika nenten tios indik putusan mangdane ipun nenten ngajeng surudan togog-togoge,
tur nenten ngajeng getih miwah daging beburon ane mati kacekuk,
turmaning mangdane ipun ngadohang raga saking paindikan cabul.”
26 Raris benjangane,
dane Paulus sareng makapapat anake punika nglaksanayang upacara pabersihan raga.
Salanturnyane dane ngranjing ka Genah Agung Mabakti kapining Sang Hyang Pengardi.
Irika dane nguningayang malih pidan upacara nyuciang raga punika jagi puput.
Duk punika,
aturan ipun suang-suang jagi kaaturang.
Dane Paulus Kaejuk ring Kota Yerusalem
27 Ritatkala pitung dina upacara pabersihan raga punika jagi puput,
wenten makudang anak Yahudi saking Propinsi Asia Alit nyingakin dane Paulus ring Genah Agung Mabaktine.
Anake punika raris manes-manesin anake akeh tur ngejuk dane Paulus.
28 Anake punika majeritan keras sapuniki,
“Duh para anak Israel,
mriki ja tulungin tiang sami!
Anake puniki sampun maideh-idehan ngajahin anake makasami mangdane nungkasin bangsan iragane,
ukum agama Yahudine miwah Genah Agung Mabaktine puniki.
Samaliha,
ipun makta anak nenten Yahudi ngranjing ka Genah Agung Mabaktine sane ngranayang genah sucine puniki dados cemer.”
29 Ipun mabaos sekadi punika krana ipun sampun nyingakin anak saking Kota Epesus sane mapesengan Tropimus sareng dane Paulus ring kota.
Ipun sami ngaden dane Paulus sampun makta ipun ngranjing ring Genah Agung Mabaktine.
30 Punika mawinan anake makasami ring kotane punika dados biyut tur ipun sami gelis-gelis mapunduh irika.
Irika raris anake akeh punika ngejuk tur maid dane Paulus ka jaban Genah Agung Mabaktine.
Duk punika pramangkin korin Genah Agung Mabaktine kaubetang.
31 Ritatkala anake akeh punika ngutsahayang ngamademang dane Paulus,
wenten anak sane matur ring pemimpin pasukan Romane indik wenten biyut ring saluirin Kota Yerusalem.
32 Raris pemimpin pasukane pramangkin kairingin antuk makudang prawira lan tentarannyane gelis-gelis luas ka genah biyute punika.
Ritatkala anake akeh punika nyingakin pemimpin pasukane kasarengin para tentarannyane,
anake akeh nenten malih nyagurin dane Paulus.
33 Pemimpin pasukane punika raris nampekin tur ngejuk dane Paulus.
Ipun nunden anak mangda negul tangan dane Pauluse nganggen kalih rante.
Raris pemimpin pasukane mataken sirake dane Paulus tur napi sane sampun laksanayang dane.
34 Nanging saking anake akeh punika wenten sane masaur sapuniki;
wenten pada sane masaur sapunika.
Sekadi punika pemimpin pasukane nenten uning napike sujatine sane mamargi irika krana kawentenan anake akeh punika kalintang biyut.
Punika mawinan pemimpin pasukane nunden mangda dane Paulus kabakta ka markas.
35 Ritatkala dane Paulus sampun rauh ring undag markase punika,
anake sane makarya biyut punika ngamuk.
Punika mawinan dane Paulus musti kaangkat olih para tentarane.
36 Duk punika,
anake akeh punika nututin tentarane sambilanga majeritan keras sapuniki,
“Matiang ja anake ento.”
Dane Paulus Mabela Raga
37 Ritatkala jagi ngranjing ka markase,
dane Paulus mabaos kapining pemimpin pasukane sapuniki,
“Dadoske titiang matur kapining jerone?”
Raris pemimpin pasukane mabaos sapuniki,
“Adi ragane bisa mabasa Yunani?
38 Yening keto,
ragane tusing ja anak Mesir ane brontak ento?
Ipidan anake ento taen mimpin petang tali (4.000) diri anak ane masenjata ka tongos ane bengang linggah.”
39 Raris dane Paulus masaur sapuniki,
“Titiang anak Yahudi!
Titiang warga Kota Tarsus,
kota sane utama ring Propinsi Kilikia.
Icen ja titiang galah matur ring anake sami iriki.”
40 Sasampune dane Paulus kicen galah,
dane raris ngadeg ring undage tur ngicen tanda nganggen tangan sane mawinan anake sami dados meneng.
Raris dane Paulus mabaos kapining ipun sami nganggen basa Ibrani.